ಮಳೆ ಮುಂದುವರಿದ ನಾಶನಷ್ಟ: ಮರಗಳು ಬಿದ್ದು ಹಲವೆಡೆ ಸಾರಿಗೆ ಅಡಚಣೆ; ವಿದ್ಯುತ್ ಕಣ್ಣುಮುಚ್ಚಾಲೆ

0
22

ಕಾಸರಗೋಡು: ಧಾರಾಕಾರ  ಮಳೆ ಮತ್ತು ಬಿರುಗಾಳಿ ಜಿಲ್ಲೆಯ ಹಲವೆಡೆ  ಮುಂದುವರಿಯುತ್ತಿದ್ದು ಭಾರೀ ನಾಶನಷ್ಟವುಂಟುಮಾಡಿದೆ.

ವಿದ್ಯಾನಗರ ಇಂಡಸ್ಟ್ರಿಯಲ್ ಎಸ್ಟೇಟ್ ಒಳಗಡೆ ಕಲೆಕ್ಟರೇಟ್‌ಗೆ ಹೋ ಗುವ ಕಿರು ಗೇಟಿನ ಬಳಿ ನಿನ್ನೆ ಬೃಹತ್ ಮರ ಬುಡಸಹಿತ ಕುಸಿದು ರಸ್ತೆಗೆ ಅಡ್ಡವಾಗಿ ಬಿದ್ದಿದು ಅದರ ಅಡಿಯಲ್ಲಿ ನಿಲ್ಲಿಸಿದ್ದ ಹಳೆ ಕಾರು  ನಜ್ಜುಗುಜ್ಜಾಗಿದೆ.

ನಗರದ ತಾಳಿಪಡ್ಪು ಉಮಾ ನರ್ಸಿಂಗ್ ಹೋಮ್ ಬಳಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ನಿನ್ನೆ ರಾತ್ರಿ ತೇಗಿನ ಮರ ಕುಸಿದು ರಸ್ತೆಗೆ ಬಿದ್ದಿದೆ. ಇದರಿಂದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸುಮಾರು ಒಂದು ತಾಸು ಸಾರಿಗೆ ಅಡಚಣೆಯುಂಟಾ ಗಿತ್ತು.  ಅಲ್ಲದೆ ಕರಂದಕ್ಕಾಡ್ ಜಂಕ್ಷನ್ ಬಳಿಯೂ ನಿನ್ನೆ ರಸ್ತೆಗೆ ಮರ ಬಿದ್ದಿದೆ.

ಮುಳಿಯಾರು ಬಳಿಯ  ಕೋಟೂರು ತಿರುವಿನಲ್ಲಿ ಮರ ಕುಸಿದು ರಸ್ತೆಗೆ ಅಡ್ಡಾದಿಡ್ಡಿಯಾಗಿ ಬಿದ್ದಿದೆ. ಎರಡು ವಿದ್ಯುತ್ ಕಂಬಗಳು ಇಲ್ಲಿ ಮುರಿದು ಬಿದ್ದಿವೆ. ಬೇವಿಂಜ ತಿರುವಿನಲ್ಲಿ ಮರ ರಸ್ತೆಗೆ ಬಿದ್ದಿದೆ. ಈ ಎಲ್ಲಾ ಪ್ರದೇಶಗಳಿಗೂ ಕಾಸರಗೋಡು ಅಗ್ನಿಶಾಮಕದಳ ತೆರಳಿ ಮರ ಕಡಿದು ರಸ್ತೆ ತಡೆ ನಿವಾರಿಸಿದೆ.

ಗಾಳಿ ಮಳೆಗೆ ಮರಗಳು ತುಂಡಾಗಿ ವಿದ್ಯುತ್ ಕಂಬ ಮತ್ತು ತಂತಿಗಳ ಮೇಲೆ ಬಿದ್ದಿರುವುದರಿಂದ ಕಾಸರಗೋಡು ಮತ್ತು ಮಂಜೇಶ್ವರ ತಾಲೂಕಿನ ಹಲವೆಡೆ ವಿದ್ಯುತ್ ಪೂರೈಕೆಯಲ್ಲಿ ವ್ಯತ್ಯಯವುಂಟಾ ಗಿದೆ.  ವಿದ್ಯಾನಗರ ಬಿ.ಸಿ ರೋಡ್‌ನಲ್ಲಿ ಮರ ಮುರಿದು ವಿದ್ಯುತ್ ತಂತಿ ಮೇಲೆ ಬಿದ್ದಿದೆ. ಇದರಿಂದ ಈ ಪ್ರದೇಶದಲ್ಲಿ ವಿದ್ಯುತ್ ವಿತರಣೆ ಮೊಟಕುಗೊಂಡಿದೆ.

ವರ್ಕಾಡಿ, ಮೀಂಜ ಪಂಚಾಯತ್ ವ್ಯಾಪ್ತಿಯ ವಿವಿಧ ಕಡೆಗಳಲ್ಲಿ ಮರ ಬಿದ್ದು ರಸ್ತೆ ತಡೆ ಸೃಷ್ಟಿಯಾಗಿದೆ.

ಕುಂಜತ್ತೂರು ತೂಮಿನಾಡು ಎಂಬಲ್ಲಿ ವಿದ್ಯುತ್ ಕಂಬವೊಂದು ಚಲಿಸುತ್ತಿದ್ದ ಆಟೋರಿಕ್ಷಾಕ್ಕೆ ಬಿದ್ದಿದೆ. ಇದರಿಂದ ರಿಕ್ಷಾಕ್ಕೆ ಹಾನಿಯಾಗಿದ್ದು, ಪ್ರಯಾಣಿಕರು ಗಾಯಗಳಿಲ್ಲದೆ ಪಾರಾಗಿದ್ದಾರೆ. ಇದರ ಸಮೀಪದ ಶ್ರೀ ಮಹಾಕಾಳಿ ಭಜನಾ ಮಂದಿರದ ದ್ವಾರದ ಬಳಿ ಮರವೊಂದು ರಸ್ತೆಗೆ ಬಿದ್ದು ಅಲ್ಪ ಹೊತ್ತು ರಸ್ತೆ ತಡೆಗೆ ಸೃಷ್ಟಿಯಾಗಿದೆ. ತೂಮಿನಾಡು ಉದಯನಗರದ ಮಾಧವ, ಲಕ್ಷ್ಮಿ ಎಂಬವರ ಮನೆಗೆ ಸಮೀಪ ಬೃಹತ್ ಹಲಸಿನ ಮರ ಮುರಿದು ಬಿದ್ದಿದ್ದು, ಆದರೆ ಮನೆಗಳಿಗೆ ಹಾನಿ ಉಂಟಾಗಿಲ್ಲ.  ಮುರತ್ತಣೆ ಗಾಂಧಿ ನಗರದಲ್ಲಿ ಅಕೇಶಿಯಾ ಮರವೊಂದು ರಸ್ತೆಗೆ ಬಿದ್ದು, ಸಂಚಾರ ತಡೆ ಸೃಷ್ಟಿಯಾಗಿದೆ. ಇದರ ಸಮೀಪವೇ ಅಲ್ಪದೂರ ಇನ್ನೊಂದು ಮರ ಎಚ್.ಟಿ. ಲೈನ್‌ಗೆ ಬಿದ್ದಿದ್ದು, ಈ ದಾರಿಯಲ್ಲಿ ವಾಹನ ಸಂಚಾರ ಸ್ಥಗಿತಗೊಂಡಿದೆ. ಈಗ ಹೊಸಂಗಡಿ ಯಿಂದ ಆನೆಕಲ್ಲು ಭಾಗಕ್ಕೆ ತೆರಳುವ ಬಸ್ ಸಹಿತ ವಾಹನಗಳು ಪಾವೂರು ಕ್ರಾಸ್ ರಸ್ತೆಯಾಗಿ ಬೇಕರಿ ಜಂಕ್ಷನ್ ಮೂಲಕ ಸಂಚರಿಸುತ್ತಿವೆ.

NO COMMENTS

LEAVE A REPLY