ಕಾಸರಗೋಡಿಗೆ ಇನ್ನು ಶರವೇಗ: ರಾ. ಹೆದ್ದಾರಿ, ಫ್ಲೈ ಓವರ್ ನಿರ್ಮಾಣ ಕೆಲಸ ಫೆಬ್ರವರಿಯೊಳಗೆ ಪೂರ್ಣ

ಕಾಸರಗೋಡು: ರಾಷ್ಟ್ರೀಯ ಹೆದ್ದಾರಿ-66 ಅಭಿವೃದ್ಧಿ ಯೋಜನೆ ಯಂತೆ  ನಗರದ ಕರಂದಕ್ಕಾಡಿನಿಂದ ಆರಂಭಗೊಂಡು ನುಳ್ಳಿಪ್ಪಾಡಿ ತನಕ ನಿರ್ಮಿಸಲಾಗುತ್ತಿರುವ ಫ್ಲೈ ಓರ್‌ನ ನಿರ್ಮಾಣ ಕೆಲಸ ಫೆಬ್ರವರಿ ತಿಂಗಳೊಳಗೆ ಪೂರ್ಣಗೊಳ್ಳಲಿದೆ.

ಇದರ ನಿರ್ಮಾಣ ಕೆಲಸ ಶರವೇಗದಲ್ಲಿ ನಡೆಯುತ್ತಿದ್ದು, ಅದನ್ನು ಕೆಲವೇ ವಾರದೊಳಗಾಗಿ ಪೂರ್ತೀಕರಿಸಿ ಫೆಬ್ರವರಿ ೧೫ರಿಂದ   ಸಾರಿಗೆ ಸಂಚಾರಕ್ಕಾಗಿ ತೆರೆದುಕೊಡುವ ಪ್ರಯತ್ನದಲ್ಲಿ ಇದರ ನಿರ್ಮಾಣ ಗುತ್ತಿಗೆದಾರ ಸಂಸ್ಥೆಯಿಂದ  ಊರಾಳುಂಗಲ್ ಲೇಬರ್  ಕೋ-ಆಪರೇಟಿವ್ ಸೊಸೈಟಿ ಮುಂದಾಗಿದೆ.

ಇಡೀ ಭಾರತದಲ್ಲಿ ಅತೀ ಹೆಚ್ಚು ಅಗಲಹೊಂದಿರುವ ಏಕ ಸ್ತಂಬದಲ್ಲಿ ನಿರ್ಮಿಸಲಾಗಿರುವ ಫ್ಲೈ ಓವರ್ ಆಗಿದೆ ಇದು. ಪ್ರೀ ಫ್ಯಾಬ್ರಿಕೇಶನ್ ಟೆಕ್ನೋಲಜಿಯಲ್ಲಿ ಇದರ ನಿರ್ಮಾಣ ಕೆಲಸ ನಡೆಸ ಲಾಗುತ್ತಿದೆ. ಈ ಫ್ಲೈ ಓವರ್ ಒಟ್ಟು 29 ಸ್ತಂಭಗಳನ್ನು ಹೊಂದಿದೆ. ಮಾತ್ರವಲ್ಲದೆ 1.13 ಕಿಲೋ ಮೀಟರ್ ಉದ್ದ ಹೊಂದಿದ ಇದರ ಶೇ. 95ರಷ್ಟು ನಿರ್ಮಾಣ ಕೆಲಸ ಈಗಾಗಲೇ ಪೂರ್ಣಗೊಂಡಿದೆ. ಇದು ಚತುಷ್ಪಥ ಸೌಕರ್ಯ ಹೊಂದಿರುವ ಫ್ಲೈ ಓವರ್ ಆಗಿದೆ.

ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ  ಅನುಮತಿ ಲಭಿಸಿದ ಬಳಿಕ ಇದನ್ನು ಸಾರಿಗೆ ಸೌಕರ್ಯ ಕ್ಕಾಗಿ ಬಿಟ್ಟು ಕೊಡಲಾಗುವುದು. ಇನ್ನು ಈ ಫ್ಲೈ ಓವರ್ ಬಳಿಯ ಅಪ್ರೋಚ್ ರಸ್ತೆಗಳ ಕೆಲಸ ಪೂರ್ಣಗೊಳ್ಳಲು ಬಾಕಿ ಇದೆ. ಅದನ್ನು ಮುಂದಿನ ತಿಂಗಳೊಳಗೆ ಪೂರ್ತೀಕ ರಿಸುವ ಯತ್ನ ನಡೆಯುತ್ತಿದೆ. ಇದು ಪೂರ್ಣಗೊಂಡಲ್ಲಿ ನಗರದಲ್ಲಿ ಈಗ ತಲೆಯೆತ್ತಿರುವ ಸಾರಿಗೆ ಸಂಚಾರ ಸಮಸ್ಯೆಗೆ ಪರಿಹಾರ ಉಂಟಾಗಲಿದೆ.

Leave a Reply

Your email address will not be published. Required fields are marked *

You cannot copy content of this page