ಬಡ ಕುಟುಂಬದ ಹೆಂಚಿನ ಮನೆ ಛಾವಣಿ ಕುಸಿತ
ನೀರ್ಚಾಲು: ಧಾರಾಕಾರ ಮಳೆ, ಗಾಳಿಗೆ ಹೆಂಚಿನ ಮನೆಯ ಮೇಲ್ಛಾವಣಿ ಕುಸಿದುಬಿದ್ದಿದ್ದು, ಅದೃಷ್ಟವಶಾತ್ ಕುಟುಂಬ ಅಪಾಯದಿಂದ ಪಾರಾದ ಘಟನೆ ನಡೆದಿದೆ. ಚೆನ್ನೆಗುಳಿ ನಿವಾಸಿ ಮಾಯಿಲ ಎಂಬವರ ಮನೆ ನಿನ್ನೆ ರಾತ್ರಿ ಕುಸಿದಿದೆ. ಈ ವೇಳೆ ಮನೆಯೊಳಗಿದ್ದವರು ಶಬ್ದ ಕೇಳಿ ಹೊರಗೆ ಓಡಿದ್ದು ಇದರಿಂದ ಭಾರೀ ಅಪಾ ಯದಿಂದ ಪಾರಾಗಿದ್ದಾರೆ. ಮೇಲ್ಛಾವಣಿಯ ಉಳಿದ ಭಾಗ ಯಾವುದೇ ಸಮಯದಲ್ಲಿ ಕುಸಿಯುವ ಸಾಧ್ಯತೆ ಇದೆಯೆನ್ನಲಾಗಿದೆ.
ಹದಿನೇಳು ವರ್ಷಗಳ ಹಿಂದೆ ನಿರ್ಮಿಸಿದ ಮನೆ ಇದಾಗಿದೆ. ಈ ಮನೆ ಕುಸಿಯುವುದರೊಂದಿಗೆ ಕುಟುಂಬಕ್ಕೆ ವಾಸ ಸೌಕರ್ಯವಿಲ್ಲದಾಗಿದೆ. ಸರಕಾರದ ಲೈಫ್ ವಸತಿ ಯೋಜನೆಯಲ್ಲಿ ಮಾಯಿಲರ ಹೆಸರಿದೆಯೆಂದು ಹೇಳಲಾಗುತ್ತಿದ್ದರೂ ಇವರಿಗೆ ಮನೆ ಮಂಜೂರಾಗಿಲ್ಲ. ಸಂಬಂಧಪಟ್ಟ ಅಧಿಕಾರಿಗಳು ಇನ್ನಾದರೂ ಮನೆ ದೊರಕಿಸಿಕೊಡಬೇಕೆಂದು ಕುಟುಂಬ ಆಗ್ರಹಿಸುತ್ತಿದೆ.
