ಕೊಲ್ಲಂನಲ್ಲೊಂದು ಪಾಕಿಸ್ತಾನ್ ಮುಕ್ಕ್ ಹೆಸರು ಬದಲಿಸಿದ ಪಂಚಾಯತ್

ಕೊಲ್ಲಂ: ಪಹಲ್ಗಾಮ್ ಉಗ್ರವಾದಿ ಆಕ್ರಮಣದ ಬೆನ್ನಲ್ಲೇ ಸ್ಥಳೀಯರ ಪ್ರತಿಭಟನೆ ತೀವ್ರಗೊಂಡ ಹಿನ್ನೆಲೆಯಲ್ಲಿ  ಕೊಲ್ಲಂ ಕುನ್ನತ್ತೂರು ಪಂಚಾಯತ್‌ನ ಪಾಕಿಸ್ತಾನ್ ಮುಕ್ಕ್ ಎಂಬ ಸ್ಥಳದ ಹೆಸರನ್ನು ಬದಲಿಸಲಾಗಿದೆ. ಈ ಪ್ರದೇಶಕ್ಕೆ ಐವರ್‌ಕಾಲ ಎಂಬ ಹೆಸರು  ನೀಡಲು ಪಂಚಾಯತ್ ಆಡಳಿತ ಸಮಿತಿ ಒಮ್ಮತದಿಂದ ತೀರ್ಮಾನಿಸಿದೆ. ಇತಿಹಾಸಕ್ಕೆ ಸಂಬಂಧಿಸಿ ಈ ಸ್ಥಳಕ್ಕೆ ಸೂಕ್ತವಾದ ಹೆಸರಾಗಿದೆ ಐವರ್ ಕಾಲ. ಆದರೆ ಪಾಕಿಸ್ತಾನ್ ಮುಕ್ಕ್ ಹೆಸರು ಬಂದ ಬಗ್ಗೆ ಯಾವುದೇ ದಾಖಲೆಗಳು ಇಲ್ಲವೆಂದು ಪಂಚಾಯತ್ ಆಡಳಿತ ಸಮಿತಿ ತಿಳಿಸಿದೆ. ಈ  ಪಂಚಾಯತ್‌ನ ನಿಲಕ್ಕಲ್ ವಾರ್ಡ್‌ನಲ್ಲಿ ಪಾಕಿಸ್ತಾನ್ ಮುಕ್ಕ್ ಎಂಬ ಹೆಸರಿದೆ. ಸಿಪಿಎಂ ಈ ಪಂಚಾಯತ್ ಆಡಳಿತ ನಡೆಸುತ್ತಿದೆ. ಉಗ್ರಗಾಮಿಗಳ ಆಕ್ರಮಣದ ಬಳಿಕ  ದೇಶದಲ್ಲಿ ಉಂಟಾದ ಭಾವನೆಯನ್ನು ಗಣನೆಗೆ ತೆಗೆದು ಈ ಕ್ರಮ ಕೈಗೊಂಡಿರುವುದಾಗಿ ಪಂ. ಉಪಾಧ್ಯಕ್ಷ ಬಿನೇಶ್ ಕಡಂಬನಾಡ್ ತಿಳಿಸಿದ್ದಾರೆ.

ಪಾಕಿಸ್ತಾನ್ ಮುಕ್ಕ್ ಎಂಬ ಹೆಸರನ್ನು ಬದಲಿಸಬೇಕೆಂದು ಬಿಜೆಪಿ ವಾರ್ಡ್ ಪ್ರತಿನಿಧಿ ಕೆ.ಟಿ. ಅನೀಷ್ಯ ಪಂಚಾಯತ್ ಕಾರ್ಯದರ್ಶಿಗೆ ಮನವಿ ನೀಡಿದ್ದರು. ಬಳಿಕ ಆಡಳಿತ ಸಮಿತಿಯ 17 ಸದಸ್ಯರು ಕೂಡಾ ಇದನ್ನು ಬೆಂಬಲಿಸಿದರು.