ನಗರದಲ್ಲಿ ಕಳ್ಳರ ಹಾವಳಿ: ಹಲವು ವ್ಯಾಪಾರ ಸಂಸ್ಥೆಗಳಲ್ಲಿ ಕಳವಿಗೆ ಯತ್ನ; ಕಳ್ಳರ ದೃಶ್ಯ ಪತ್ತೆ
ಕಾಸರಗೋಡು: ನಗರದಲ್ಲಿ ಮತ್ತೆ ಕಳ್ಳರ ಹಾವಳಿ ತಲೆದೋರಿದ್ದು, ಆರು ವ್ಯಾಪಾರ ಸಂಸ್ಥೆಗಳಲ್ಲಿ ಕಳವು ಮತ್ತು ಯತ್ನ ನಡೆಸಿದ್ದಾರೆ. ನಗರದ ಹಳೇ ಬಸ್ ನಿಲ್ದಾಣ ಪರಿಸರದ ಸ್ವಸ್ತಿ ಮೆಡಿಕಲ್ಸ್, ಮೆಹಬೂಬ್ ಥಿಯೇಟರ್ ಬಳಿಯ ಲುಲು ಸಿಲ್ಕ್ ಟೆಕ್ಸ್‌ಟೈಲ್ ಶಾಪ್, ರೈಲ್ವೇ ಸ್ಟೇಷನ್ ರಸ್ತೆ ಬಳಿಯ ರೆಡ್ ಚಿಲ್ಲೀಸ್ ಸೂಪರ್ ಮಾರ್ಕೆಟ್, ತಾಯಲಂಗಾಡಿಯ ಜವುಳಿ ಅಂಗಡಿ ಮತ್ತು ಕೊರಕ್ಕೋಡ್ ರಸ್ತೆ ಬಳಿಯ ಸ್ಮಾರ್ಟ್ ಮೊಬೈಲ್ ಶಾಪ್ ಎಂಬೆಡೆಗಳಲ್ಲಿ ಕಳವು ಮತ್ತು ಕಳವು ಯತ್ನ ನಡೆದಿದೆ. ಅಂಗಡಿಗಳ ಶಟರ್‌ಗಳನ್ನು ಒಡೆದು ಒಳನುಗ್ಗಿದ ಕಳ್ಳರು ಚಿಲ್ಲರೆ ಹಣ ದೋಚಿದ್ದಾರೆ. ತಾಯಲಂಗಾಡಿಯ ಜವುಳಿ ಅಂಗಡಿಯಿಂದ ಕಳ್ಳರು ಹಲವು ಸೀರೆ ಸೇರಿದಂತೆ ಬಟ್ಟೆಬರೆಗಳನ್ನೂ ಕದ್ದೊಯ್ದಿದ್ದಾರೆ.
ಈ ಪೈಕಿ ಕೆಲವು ಅಂಗಡಿಗಳಲ್ಲಿರುವ ಸಿಸಿ ಟಿವಿ ಕ್ಯಾಮರಾಗಳಲ್ಲಿ ಕಳ್ಳರ ದೃಶ್ಯ ಪತ್ತೆಯಾಗಿದ್ದು, ಅದರ ಜಾಡು ಹಿಡಿದು ಕಾಸರಗೋಡು ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಕಳ್ಳರು ವಲಸೆ ಕಾರ್ಮಿಕರಾಗಿದ್ದಾರೆಂಬ ಶಂಕೆಯನ್ನು ಪೊಲೀಸರು ವ್ಯಕ್ತಪಡಿಸಿದ್ದಾರೆ.
ರೈಲು ನಿಲ್ದಾಣ ರಸ್ತೆಯ ರೆಡ್ ಚಿಲ್ಲೀಸ್ ಸೂಪರ್ ಮಾರ್ಕೆಟ್‌ನಿಂದ ಕೆಲವು ತಿಂಗಳ ಹಿಂದೆಯಷ್ಟೇ ಭಾರೀ ನಗದನ್ನು ಕಳ್ಳರು ಕದ್ದಿದ್ದರು. ಅದರ ಬೆನ್ನಲ್ಲೇ ಅಲ್ಲಿ ನಿನ್ನೆ ಮುಂಜಾನೆ ಮತ್ತೆ ಕಳವು ಈ ಯತ್ನ ನಡೆದಿದೆ. ತಿಂಗಳುಗಳ ಹಿಂದೆ ಕರಂದಕ್ಕಾಡಿನ ಸಿಟಿಕೂಲ್ ಇಲೆಕ್ಟ್ರೋನಿಕ್ಸ್ ಅಂಗಡಿ ಯೊಂದರಲ್ಲೂ ನಗದು ಮತ್ತು ಮಿಕ್ಸಿ ಯನ್ನು ಕದ್ದಿದ್ದರು. ಅಂದು ನಗರದ ಇತರ ಹಲವು ಅಂಗಡಿಗಳಲ್ಲೂ ಕಳವು ಯತ್ನ ನಡೆದಿತ್ತು.
