ಪಾಯಸ್ ಮಿಕ್ಸ್ ಹೆಸರಲ್ಲಿ ಚಿನ್ನ ಸಾಗಾಟ: ದುಬಾಯಿಂದ ಬಂದಾತ ಕಸ್ಟಡಿಗೆ
ಮಂಗಳೂರು: ಪಾಯಸ್ ಮಿಕ್ಸ್ ಎಂಬ ಹೆಸರಲ್ಲಿ ಪ್ಯಾಕೆಟ್‌ನೊಳಗೆ ಚಿನ್ನ ಸಾಗಾಟ ನಡೆಸಿದಾತನನ್ನು ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಸೆರೆ ಹಿಡಿಯಲಾಗಿದೆ. ದುಬಾಯಿಂದ ಆಗಮಿಸಿದ ಭಟ್ಕಳ ನಿವಾಸಿ ಅಲ್ತಾಫ್ ಹುಸೈನ್ ಮುಲ್ಲ (೫೪)ನ ಬ್ಯಾಗನ್ನು ಕಸ್ಟಮ್ಸ್ ಅಧಿಕಾರಿಗಳು ಪರಿಶೀಲಿಸಿದಾಗ ಕಿಚನ್ ಟ್ರಶಲ್ಸ್ ಬ್ರಾಂಡ್‌ನ ಪ್ಯಾಕೆಟ್ ಕಂಡು ಬಂದಿದೆ. ಅದರ ಮೇಲೆ ಸಂಶಯಗೊಂಡು ಪರಿಶೀಲಿಸಿದಾಗ ಅದರೊಳಗಿರುವುದು ಚಿನ್ನವೆಂದು ತಿಳಿದು ಬಂದಿದೆ. ಚಿನ್ನವನ್ನು ಹುಡಿಯಾಗಿಸಿ ಐದು ಪ್ಯಾಕೆಟ್‌ಗಳಾಗಿ ತುಂಬಿಸಿಡಲಾಗಿತ್ತು.
ಒಟ್ಟು ೩೪೭ ಗ್ರಾಂ ಚಿನ್ನವನ್ನು ಪ್ಯಾಕೆಟ್‌ನಲ್ಲಿ ತುಂಬಿಸಿ ತರಲಾಗಿದೆ. ಇದಕ್ಕೆ ೨೦ ಲಕ್ಷ ರೂಪಾಯಿ ಮೌಲ್ಯ ಅಂದಾಜಿಸಲಾಗಿದೆ ಎಂದು ಕಸ್ಟಮ್ಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಸಂಬಂಧ ಅಲ್ತಾಫ್ ಹುಸೈನ್ ಮುಲ್ಲನನ್ನು ಕಸ್ಟಡಿಗೆ ತೆಗೆಯಲಾಗಿದೆ.
