ಮಾನ್ಯ: ಮಾನ್ಯ ಶ್ರೀ ಅಯ್ಯಪ್ಪ ಭಜನಾ ಮಂದಿರದಿಂದ ಕಳವು ನಡೆಸಿದ ಪ್ರಕರಣದಲ್ಲಿ ಸೆರೆಗೀಡಾದ ಆರೋಪಿಗಳನ್ನು ಪೊಲೀಸರು ನಿನ್ನೆ ಭಜನಾ ಮಂದಿರಕ್ಕೆ ತಲುಪಿಸಿ ಮಾಹಿತಿ ಸಂಗ್ರಹಿಸಿದರು. ಬಂಬ್ರಾಣ ದ ಇಬ್ರಾಹಿಂ ಖಲಂದರ್ (42), ಕರ್ನಾಟಕ ಉಳ್ಳಾಲದ ಫೈಸಲ್ (30) ಎಂಬಿವರನ್ನು ತಲುಪಿಸಿ ಮಾಹಿತಿ ಸಂಗ್ರಹಿಸಲಾಗಿದೆ. ಈ ತಿಂಗಳ ೪ರಂದು ಮುಂಜಾನೆ ವೇಳೆ ಭಜನಾ ಮಂದಿರದಿಂದ ಕಳವು ನಡೆಸಲಾಗಿದೆ. ಗರ್ಭಗುಡಿಯ ಬಾಗಿಲು ಮುರಿದು ಒಳನುಗ್ಗಿದ ಕಳ್ಳರು ಆರು ಲಕ್ಷರೂಪಾಯಿ ಮೌಲ್ಯವುಳ್ಳ ದೇವರ ಬೆಳ್ಳಿಯ ಛಾಯಾಚಿತ್ರ, ಫಲಕ, ಬೆಳ್ಳಿಯ ರುದ್ರಾಕ್ಷಿ ಮಾಲೆ ಹಾಗೂ ಎರಡು ಗ್ರಾಂ ತೂಕದ ಲಾಕೆಟ್‌ಗಳನ್ನು ಕಳವು ನಡೆಸಲಾಗಿತ್ತು. ಈ ಪ್ರಕರಣದಲ್ಲಿ ಒಟ್ಟು ೫ ಮಂದಿ ಆರೋಪಿಗಳಿರುವುದಾಗಿ ತಿಳಿದು ಬಂದಿದ್ದು, ಇನ್ನೂ ಮೂವರನ್ನು ಸೆರೆಹಿಡಿಯಲು ಬಾಕಿಯಿದೆ. ನೆಲ್ಲಿಕಟ್ಟೆ ಗುರುಮಂದಿರದಿಂದಲೂ ಅದೇ ದಿನ ಕಳವು ನಡೆದಿತ್ತು. ಕಚೇರಿಯ ಬಾಗಿಲು ಮುರಿದು ಒಳನುಗ್ಗಿದ ಕಳ್ಳರು ಕಪಾಟಿ ನಿಂದ ೨೫ ಸಾವಿರ ರೂಪಾಯಿಗಳನ್ನು ದೋಚಿದ್ದರು.
