ಪಸರಿಸತೊಡಗಿದೆ ಹಳದಿ ಕಾಮಾಲೆ ಜ್ವರ: ಚಿಕಿತ್ಸೆ ಪಡೆದಿದ್ದು 81 ಮಂದಿ

ಕಾಸರಗೋಡು: ಜಿಲ್ಲೆಯಲ್ಲಿ ಹಳದಿ ಕಾಮಾಲೆ ಜ್ವರ (ಹೈಪರೈಟೀಸ್-ಎ) ಹರಡತೊಡಗಿದೆ. 2024ರಲ್ಲಿ ಈ ತನಕದ ಲೆಕ್ಕಾಚಾರದಂತೆ ಜಿಲ್ಲೆಯಲ್ಲಿ ಜ್ವರಕ್ಕೆ 58 ಮಂದಿಗೆ ಹಳದಿ ಕಾಮಾಲೆ ಜ್ವರ ತಗಲಿರುವುದನ್ನು ದೃಢಪಡಿಸಲಾಗಿದೆ. ಇವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಇದೇ ವೇಳೆ ಈ ಜ್ವರದ ಲಕ್ಷಣ ಉಂಟಾದ ಹಲವರು ಈ ಅವಧಿಯಲ್ಲಿ ಚಿಕಿತ್ಸೆ ಪಡೆದಿದ್ದು, ಆ ಮೂಲಕ ಒಟ್ಟು ಚಿಕಿತ್ಸೆ ಪಡೆದವರ ಸಂಖ್ಯೆ ಈಗ 81ಕ್ಕೇರಿದೆ.
ಮೊಗ್ರಾಲ್ ಪುತ್ತೂರು ಪ್ರದೇಶದಲ್ಲಿ ಅತೀ ಹೆಚ್ಚು ಹಳದಿ ಕಾಮಾಲೆ ಜ್ವರ ಕಾಣಿಸಿಕೊಂಡಿದೆ. ಇಲ್ಲಿ ಸ್ಥಿತಿ ಈಗ ನಿಯಂತ್ರಣದಲ್ಲಿದೆ ಎಂದು ಆರೋಗ್ಯ ಇಲಾಖೆಯ ಅಧಿಕಾರಿಗಳು ಹೇಳಿದ್ದಾರೆ.
ಈ ವರ್ಷ ಮಾರ್ಚ್ ತಿಂಗಳಲ್ಲಿ ಅತೀ ಹೆಚ್ಚು ಮಂದಿ ಯಲ್ಲಿ ಈ ಜ್ವರ ಕಾಣಿಸಿಕೊಂಡಿದೆ. ಅಂದರೆ ಮಾರ್ಚ್ ತಿಂಗಳಲ್ಲಿ ಮಾತ್ರವಾಗಿ 24 ಮಂದಿಯಲ್ಲಿ ಹಳದಿ ಕಾಮಾಲೆ ತಗಲಿರುವುದನ್ನು ದೃಢೀಕರಿಸಲಾಗಿದೆ. ಜನವರಿಯಲ್ಲಿ 18, ಫೆಬ್ರವರಿ- 5 ಮತ್ತು ಎಪ್ರಿಲ್ನಲ್ಲಿ 11 ಮಂದಿ ಈ ಜ್ವರಕ್ಕೆ ಚಿಕಿತ್ಸೆ ಪಡೆದಿದ್ದಾರೆ.
2022-23ನೇ ವರ್ಷದಲ್ಲಿ ಜಿಲ್ಲೆಯ ಎಲ್ಲೂ ಹಳದಿ ಕಾಮಾಲೆ ಜ್ವರ ವರದಿಯಾಗಿಲ್ಲ. 2022ರಲ್ಲಿ 2 ಮತ್ತು 2023ರಲ್ಲಿ ಇಬ್ಬರಲ್ಲಿ ಈ ಜ್ವರ ಲಕ್ಷಣ ಕಾಣಿಸಿಕೊಂಡಿತ್ತು.
ಮಲೀನ ಜಲ ಮತ್ತು ಆಹಾ ರದ ಮೂಲಕ ಈ ಜ್ವರ ತಗಲುತ್ತಿದೆ. ಈ ಜ್ವರ ಕಾಣಿಸಿಕೊಂಡವರ ಕಣ್ಣಿನಲ್ಲಿ ಮೊದಲು ಹಳದಿ ಬಣ್ಣ ಗೋಚರಿಸುತ್ತದೆ. ಮೂತ್ರದ ಬಣ್ಣ ಬದಲಾಗಿ, ತೀವ್ರ, ದೈಹಿಕ ಅಸ್ವಸ್ಥತೆ ಉಂಟಾಗುವುದು ಈ ಜ್ವರದ ಆರಂಭಿಕ ಲಕ್ಷಣವಾಗಿದೆ. ಇದರ ಜತೆಗೆ ವಾಂತಿ, ಉದರ ನೋವು, ತಲೆನೋವು, ಸ್ನಾಯು ನೋವು, ಜ್ವರವೂ ಅನುಭವಗೊಳ್ಳುತ್ತದೆ. ಇಂತಹ ಲಕ್ಷಣ ಯಾರಲ್ಲಾದರೂ ಕಾಣಿಸಿಕೊಂಡಿದ್ದಲ್ಲಿ ಅವರು ತಕ್ಷಣ ಚಿಕಿತ್ಸೆ ಪಡೆಯಬೇಕೆಂದೂ ಆರೋಗ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.