ಪಾನಮತ್ತನಿಂದ ರೈಲಿಗೆ ಕಲ್ಲು ತೂರಾಟ : ಪ್ರಯಾಣಿಕನಿಗೆ ಗಂಭೀರ ಗಾಯ

ಕಾಸರಗೋಡು: ಪಾನಮತ್ತನಾಗಿ ರೈಲಿನೊಳಗೆ ಉಪಟಳ ನೀಡುತ್ತಿದ್ದ ವ್ಯಕ್ತಿಯನ್ನು ಪ್ರಯಾಣಿಕರು ಸೇರಿ ರೈಲಿನಿಂದ ಹೊರದಬ್ಬಿದ ದ್ವೇಷದಿಂದ ಆತ ರೈಲಿಗೆ ಕಲ್ಲು ತೂರಾಟ ನಡೆಸಿ ಓರ್ವ ಪ್ರಯಾಣಿಕ ಗಂಭೀರ ಗಾಯಗೊಂಡ ಘಟನೆ ನಡೆದಿದೆ.ಕೊಲ್ಲಂ ಶಕ್ತಿಕುಳಂಗರ ನಿವಾಸಿ ಮುರಳೀಧರನ್ (63) ಎಂಬವರು ಕಲ್ಲು ತೂರಾಟದಿಂದ ಗಾಯಗೊಂಡಿದ್ದು, ಅವರನ್ನು ನೀಲೇಶ್ವರದ ಖಾಸಗಿ ಆಸ್ಪತ್ರೆ ಯೊಂದರಲ್ಲಿ ದಾಖಲಿಸಲಾಗಿದೆ.

ಮಂಗಳೂರಿನಿಂದ ಬರುತ್ತಿದ್ದ ವೆಸ್ಟ್‌ಕೋಸ್ಟ್ ಎಕ್ಸ್‌ಪ್ರೆಸ್ ರೈಲಿನಲ್ಲಿ ಪಾನಮತ್ತನಾದ ವ್ಯಕ್ತಿಯೋರ್ವ ಏರಿ ಪ್ರಯಾಣಿಕರಿಗೆ ಕಿರುಕುಳ ನೀಡಲಾರಂಭಿಸಿದಾಗ ಆತನ ಉಪಟಳವನ್ನು ಸಹಿಸಲಾಗದೆ ರೈಲು  ಕಾಸರಗೋಡು ನಿಲ್ದಾಣಕ್ಕೆ ತಲುಪಿದಾಗ ಆತನನ್ನುಪ್ರಯಾಣಿಕರು ರೈಲಿನಿಂದ ಹೊರ ದಬ್ಬಲೆತ್ನಿಸಿದ್ದಾರೆ. ಆಗ ರೈಲು ಮುಂದಕ್ಕೆ ಸಾಗಿದ ಬಳಿಕ ರೈಲು ಹೊಸದುರ್ಗ ನಿಲ್ದಾಣಕ್ಕೆ ತಲುಪಿದಾಗ ಪ್ರಯಾಣಿಕರು ಆ ಕುಡುಕನನ್ನು ರೈಲಿನಿಂದ ಹೊರ ಹಾಕುವಲ್ಲಿ ಸಫಲರಾದರು. ಆಗ ಕುಪಿತನಾದ ಆ ಕುಡುಕ ರೈಲು ಅಲ್ಲಿಂದ ಮುಂದಕ್ಕೆ ಸಾಗಿದಾಕ್ಷಣ ಅದಕ್ಕೆ ಕಲ್ಲು ತೂರಾಟ ನಡೆಸಿದ್ದಾನೆ. ಆಗ ರೈಲಿನಲ್ಲಿದ್ದ ಮುರಳೀಧರನ್‌ರ ದೇಹದ ಮೇಲೆ ಆ ಕಲ್ಲು ತಗಲಿ ಅವರು ಗಂಭೀರ ಗಾಯಗೊಂಡಿದ್ದಾರೆ. ಅವರನ್ನು ನೀಲೇಶ್ವರದ ಖಾಸಗಿ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದೆ. ಕಲ್ಲೆಸೆತದ ಬಳಿಕ ಕುಡುಕ ತಪ್ಪಿಸಿಕೊಂಡಿದ್ದು, ಆತನ ಪತ್ತೆಗಾಗಿರುವ ಶೋಧ ಕಾರ್ಯಾಚರಣೆಯನ್ನು ಸಮೀಪದ ಸಿಸಿಟಿವಿ ದೃಶ್ಯಗಳನ್ನು ಕೇಂದ್ರೀಕರಿಸಿ ಪೊಲೀಸರು ಆರಂಭಿಸಿದ್ದಾರೆ.