೧೩.೨೪ ಲಕ್ಷ ವಿದೇಶಿ ಕರೆನ್ಸಿ ಮತ್ತು ಭಾರತೀಯ ಕರೆನ್ಸಿ ವಶ: ಓರ್ವ ಕಸ್ಟಡಿಗೆ 

ಕಾಸರಗೋಡು: ಕಾಸರಗೋಡು ಚಕ್ಕರಬಜಾರ್‌ನಲ್ಲಿ ಪೊಲೀಸರು ನಿನ್ನೆ ನಡೆಸಿದ ಕಾರ್ಯಾಚರಣೆಯಲ್ಲಿ ೧೩,೨೪,೮೦೦ ರೂ. ಮೌಲ್ಯದ ವಿದೇಶಿ ಕರೆನ್ಸಿ ನೋಟು ಮತ್ತು ೩೨ ಸಾವಿರ ಭಾರತೀಯ ಕರೆನ್ಸಿ ನೋಟುಗಳನ್ನು ಪತ್ತೆಹಚ್ಚಿ ವಶಪಡಿಸಿದ್ದಾರೆ.  ಕಾಳಧನವೆಂಬ ಶಂಕೆಯಲ್ಲಿ ಈ ನೋಟುಗಳನ್ನು ವಶಪಡಿಸಲಾಗಿದೆ. ಕಾಸರಗೋಡು ಪೊಲೀಸ್ ಠಾಣೆಯ ಎಸ್‌ಐ  ಕೆ.ಪಿ.ವಿನೋದ್ ಕುಮಾರ್ ನೇತೃತ್ವದ ಪೊಲೀಸ್ ತಂಡ ನಿನ್ನೆ ರಾತ್ರಿ ಈ ಕಾರ್ಯಾಚರಣೆ ನಡೆಸಿದೆ. ಇದಕ್ಕೆ ಸಂಬಂಧಿಸಿ  ಮಲಪ್ಪುರಂ  ನಿಡಿಇರಿಪ್ಪ್ ಗ್ರಾಮದ ಕೊಂಡೋಟಿ ಕೊಟ್ಟಿಯೋಡತ್ತಿಲ್ ಹೌಸ್‌ನ ಅಬೂಬಕರ್ ಸಿದ್ದಿಕ್ ಪಿ (೪೭) ಎಂಬಾತನನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ. ವಶಪಡಿಸಲಾದ ಮಾಲಿನಲ್ಲಿ ೧೨೦ ಸೌದಿ ರಿಯಾಲ್ ಮತ್ತು ೫೦೦ ರೂ.ಗಳ ೬೫  ನೋಟುಗಳ ಒಟ್ಟು ೩೨ ಸಾವಿರ ರೂ. ಭಾರತೀಯ ಕರೆನ್ಸಿ ನೋಟುಗಳು ಒಳಗೊಂಡಿವೆ. ಒಂದು ಸೌದಿ ರಿಯಾದ್‌ಗೆ ಭಾರತದಲ್ಲಿ ೨೨.೮ ರೂ. ಮೌಲ್ಯ ಹೊಂದಿದೆ.  ಕಾಳಧನ ಸಾಗಿಸುವ ಬಗ್ಗೆ ಕಾಸರಗೋಡು ಪೊಲೀಸರಿಗೆ ಲಭಿಸಿದ ಗುಪ್ತ ಮಾಹಿತಿಯಂತೆ  ಎಸ್‌ಐ  ನೇತೃತ್ವದ ತಂಡ ನಿನ್ನೆ ರಾತ್ರಿ ಚಕ್ಕರ ಬಜಾರ್‌ಗೆ ಈ ದಾಳಿ ನಡೆಸಿದೆ. ಈ ಕಾರ್ಯಾಚರಣೆ ನಡೆಸಿದ ತಂಡದಲ್ಲಿ ಎಸ್‌ಪಿ ಸ್ಕ್ವಾಡ್‌ನ ರಜೀಶ್ ಕಾಟಂಪಳ್ಳಿ,  ನಿಜಿನ್ ಮತ್ತು ಸೀನಿಯರ್ ಪೊಲೀಸ್ ಆಫೀಸರ್ ಪ್ರದೀಪನ್ ಎಂಬಿವರು ಒಳಗೊಂಡಿದ್ದಾರೆ.  ಕಸ್ಟಡಿಗೊಳಗಾದ ವ್ಯಕ್ತಿಯನ್ನು ಪೊಲೀಸರು ತೀವ್ರ ವಿಚಾರಣೆಗೊಳಪಡಿಸುತ್ತಿದ್ದಾರೆ. ವಶಪಡಿಸಲಾದ ಮಾಲನ್ನು ಇಂದು ನ್ಯಾಯಾಲಯದಲ್ಲಿ ಹಾಜರುಪಡಿಸಲಾಗುವುದೆಂದು ಪೊಲೀಸರು ತಿಳಿಸಿದ್ದಾರೆ.