ಉಪ್ಪಳ ಫ್ಲಾಟ್‌ನ ಬಾತ್‌ರೂಂನಲ್ಲಿ ಕೊಳೆತ ಸ್ಥಿತಿಯಲ್ಲಿ ವ್ಯಕ್ತಿಯ ಮೃತದೇಹ ಪತ್ತೆ
ಉಪ್ಪಳ: ಉಪ್ಪಳ ಬಸ್ ನಿಲ್ದಾಣ ಬಳಿಯ ಫ್ಲಾಟ್‌ವೊಂದರಲ್ಲಿ ಕೊಳೆತ ಸ್ಥಿತಿಯಲ್ಲಿ ವ್ಯಕ್ತಿಯ ಮೃತದೇಹ ಪತ್ತೆಯಾಗಿದೆ. ದುರ್ವಾಸನೆ ಬರುತ್ತಿದ್ದ ಹಿನ್ನೆಲೆಯಲ್ಲಿ ಫ್ಲಾಟ್‌ನ ನಿವಾಸಿಗಳು ನೋಡಿದಾಗ ಬಾತ್ ರೂಂನಲ್ಲಿ ಮೃತದೇಹ ಬಿದ್ದುಕೊಂಡ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಇಲ್ಲಿ ಪೊಸೋಟು ನಿವಾಸಿ ಶೇಖ್ ಇಬ್ರಾಹಿಂ (46) ಹಾಗೂ ಕುಟುಂಬ ವಾಸಿಸುತ್ತಿದೆ. ಕುಟುಂಬದವರು ಬಕ್ರೀದ್ ಹಿನ್ನೆಲೆಯಲ್ಲಿ ಊರಿಗೆ ತೆರಳಿದ್ದರೆನ್ನಲಾಗಿದ್ದು, ಇಬ್ರಾಹಿಂ ಒಬ್ಬರೇ ಫ್ಲಾಟ್‌ನಲ್ಲಿದ್ದರೆಂದು ತಿಳಿದು ಬಂದಿದೆ. ಪತ್ನಿ ಮನೆ ವಾಮಂಜೂರಿನಲ್ಲಿ ರುವುದಾಗಿ ತಿಳಿದು ಬಂದಿದೆ. ಇಂದು ಬೆಳಿಗ್ಗೆ ದುರ್ವಾಸನೆ ಹಿನ್ನೆಲೆಯಲ್ಲಿ ನೋಡಿದಾಗ ಎದುರಿನ ಬಾಗಿಲು ಮುಚ್ಚಿದ ಸ್ಥಿತಿಯಲ್ಲಿತ್ತು. ಬಳಿಕ ಹಿಂದು ಗಡೆಯ ಕಿಟಿಕಿ ಮೂಲಕ ನೋಡಿದಾಗ ಬಾತ್‌ರೂಂನಲ್ಲಿ ಮೃತದೇಹ ಪತ್ತೆಯಾ ಗಿದೆ. ಸ್ಥಳೀಯರು ನೀಡಿದ ಮಾಹಿತಿ ಯಂತೆ ಮಂಜೇಶ್ವರ ಪೊಲೀಸರು ಸ್ಥಳಕ್ಕೆ ತಲುಪಿದ್ದಾರೆ. ಸ್ಥಳೀಯರು ಫ್ಲಾಟ್‌ನ ಬಳಿ ಸೇರಿದ್ದಾರೆ. ಹೃದಯಾಘಾತದಿಂದ ಕುಸಿದು ಬಿದ್ದು ಸಾವು ಸಂಭವಿಸಿರಬೇಕೆಂದು ಪ್ರಾಥಮಿಕವಾಗಿ ಶಂಕಿಸಲಾಗಿದೆ. ಇತರರು ಅಲ್ಲಿ ಇಲ್ಲದ ಕಾರಣ ಮೃತಪಟ್ಟ ಬಗ್ಗೆ ತಿಳಿಯದೆ ಮೃತದೇಹ ಕೊಳೆತಿರಬೇಕೆನ್ನಲಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
