ಸೈಕಲ್ ನಷ್ಟಗೊಂಡ ಅಭಿಜಿತ್ : ಪೊಲೀಸರಿಂದ ಹೊಸ ಸೈಕಲ್
ಹೊಸದುರ್ಗ: ಕಾಣೆಯಾದ ಸೈಕಲ್‌ನ ಬಗ್ಗೆ ದೂರು ನೀಡಲು ಠಾಣೆಗೆ ತಲುಪಿದ ವಿದ್ಯಾರ್ಥಿಗೆ ಪೊಲೀಸರು ಸೈಕಲ್ ಖರೀದಿಸಿ ನೀಡಿ ಮಾದರಿಯಾದರು. ಒಂದು ವಾರದ ಹಿಂದೆ ಕಲ್ಲುರಾವಿಯ ಶ್ರೀಜಾ ಹಾಗೂ ಪುತ್ರ ಅಭಿಜಿತ್ ಹೊಸದುರ್ಗ ಪೊಲೀಸ್ ಠಾಣೆಗೆ ತಲುಪಿ ಸೈಕಲ್ ನಾಪತ್ತೆಯಾದ ಬಗ್ಗೆ ದೂರು ನೀಡಿದ್ದರು. ಅಭಿಜಿತ್ ಕಾಞಂಗಾಡ್ ಸೌತ್ ಶಾಲೆಯ ೮ನೇ ತರಗತಿ ವಿದ್ಯಾರ್ಥಿಯಾಗಿದ್ದಾನೆ. ಶಾಲೆಗೆ ತೆರಳುತ್ತಿದ್ದ ಸೈಕಲ್‌ನ್ನು ಪತ್ತೆಹಚ್ಚಿ ನೀಡಬೇಕೆಂದು ವಿದ್ಯಾರ್ಥಿ ದೂರಿನಲ್ಲಿ ಆಗ್ರಹಿಸಿದ್ದನು. ಈ ಹಿನ್ನೆಲೆಯಲ್ಲಿ ಸೈಕಲ್ ಪತ್ತೆಹಚ್ಚಿ ನೀಡುವುದಾಗಿ ಎಸ್.ಎಚ್.ಒ. ಆಸಾದ್ ಎಂ.ಪಿ. ಭರವಸೆ ನೀಡಿದ್ದು, ಆದರೆ ಹೊಸ ಸೈಕಲ್ ಖರೀದಿಗೆ ಕುಟುಂಬಕ್ಕೆ ಸಾಧ್ಯವಿಲ್ಲವೆಂದು ತಿಳಿದು ಪೊಲೀಸರು ಸೇರಿ ಅಭಿಜಿತ್‌ಗೆ ನೂತನ ಸೈಕಲ್ ಖರೀದಿಸಿ ನೀಡಿದ್ದಾರೆ. ಠಾಣೆಗೆ ತಲುಪಿದ ಅಭಿಜಿತ್ ಹಾಗೂ ತಾಯಿ ಹೊಸ ಸೈಕಲ್‌ನ್ನು ಸ್ವೀಕರಿಸಿ ಸಂತೋಷದಿಂದ ಮನೆಗೆ ಮರಳಿದ್ದಾರೆ. ಅಭಿಜಿತ್‌ನ ಸಂತೋಷದಲ್ಲಿ ಪೊಲೀಸರು ಪಾಲ್ಗೊಂಡರು.
