ಅತೀ ಹೆಚ್ಚು ಕಾಲ ಮುಖ್ಯಮಂತ್ರಿ ಸ್ಥಾನ ಅಲಂಕರಿಸಿದ್ದು ಇ.ಕೆ. ನಾಯನಾರ್

ತಿರುವನಂತಪುರ: ಅತೀ ಹೆಚ್ಚು ಕಾಲ ಕೇರಳ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸಿದ ಹೆಸರು ಸಿಪಿಎಂ (ಎಡರಂಗ)ದ ಇ.ಕೆ. ನಾಯನಾರ್ರ ಹೆಸರಲ್ಲಿ ಇನ್ನೂ ಮುಂದುವರಿಯುತ್ತಿದೆ. ಇವರು ಮೂರು ಬಾರಿ ಕೇರಳ ಮುಖ್ಯಮಂತ್ರಿಯಾಗಿದ್ದು ಆ ಸ್ಥಾನದಲ್ಲಿ ಒಟ್ಟು 4009 ದಿನಗಳ ಕಾಲ ಮುಂದುವರಿದಿದ್ದಾರೆ.
ಇನ್ನು ಎರಡನೇ ಬಾರಿ ಮುಖ್ಯಮಂತ್ರಿಯಾಗಿ ಹಾಲಿ ಮುಖ್ಯಮಂತ್ರಿ (ಎಡರಂಗ)ದ ಪಿಣರಾಯಿ ವಿಜಯನ್ 3250ಕ್ಕಿಂತಲೂ ಹೆಚ್ಚು ದಿನ ಪೂರೈಸಿದ್ದು, ಆ ಸ್ಥಾನದಲ್ಲಿ ಇನ್ನೂ ಮುಂದುವರಿಯುವ ಮೂಲಕ ಎರಡನೇ ಸ್ಥಾನದಲ್ಲಿದ್ದಾರೆ. ನಾಲ್ಕು ಬಾರಿ ಮುಖ್ಯಮಂತ್ರಿಯಾದ ಕೆ. ಕರುಣಾಕರನ್ (ಕಾಂಗ್ರೆಸ್)- 3246 ದಿನ, ಎರಡು ಬಾರಿ ಮುಖ್ಯಮಂತ್ರಿಯಾದ ಸಿ. ಅಚ್ಯುತ ಮೆನೋನ್ (ಎಡರಂಗ), 2640 ದಿನಗಳ ಅನುಕ್ರಮವಾಗಿ ನಂತರದ ಸ್ಥಾನದಲ್ಲಿದ್ದಾರೆ. ಇವರ ಹೊರತಾಗಿ ಎರಡು ಬಾರಿ ಮುಖ್ಯಮಂತ್ರಿಯಾದ ದಿ| ಉಮ್ಮನ್ ಚಾಂಡಿ (ಕಾಂಗ್ರೆಸ್) 2459 ದಿನಗಳು, ಮೂರು ಬಾರಿ ಮುಖ್ಯಮಂತ್ರಿಯಾದ ಎ.ಕೆ. ಆಂಟನಿ (ಕಾಂಗ್ರೆಸ್) 2177 ದಿನಗಳು, ನಂತರ ವಿ.ಎಸ್. ಅಚ್ಯುತಾನಂದನ್ (ಎಡರಂಗ)- 1818 ದಿನಗಳು, ಪಟ್ಟಂ ತಾನು ಪಿಳ್ಳೆ 942 ದಿನಗಳು, ಆರ್. ಶಂಕರ್ 715 ದಿನಗಳು, ಪಿ.ಕೆ. ವಾಸುದೇವನ್ ನಾಯರ್ 348 ದಿನಗಳು ಹಾಗೂ ಸಿ.ಎಚ್. ಮೊಹಮ್ಮದ್ ಕೋಯ (ಮುಸ್ಲಿಂ ಲೀಗ್), 54 ದಿನ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸಿದ್ದರು.