ಅಪರಾಧ ಕೃತ್ಯಗಳನ್ನು ಪತ್ತೆಹಚ್ಚಲು ಸ್ಥಾಪಿಸಿದ ಕ್ಯಾಮರಾವನ್ನೇ ಕದ್ದ ಕಳ್ಳರು

ಕಾಸರಗೋಡು: ಅಪರಾಧ ಕೃತ್ಯಗಳನ್ನು ತಡೆಯಲು ಸ್ಥಾಪಿಸಿದ ಸಿಸಿ ಕ್ಯಾಮರಾವನ್ನೇ ಕಳ್ಳರು ಕದ್ದು ಸಾಗಿಸಿದ ಘಟನೆ ನಡೆದಿದೆ. ಚೆಮ್ನಾಡ್ ಗ್ರಾಮ ಪಂಚಾಯತ್‌ನ ಕೀಯೂರು ಮೀನುಗಾರಿಕಾ ಬಂದರಿಗೆ ಹೋಗುವ ರಸ್ತೆ ಬಳಿ ಸ್ಥಾಪಿಸಲಾಗಿದ್ದ ಸಿಸಿ ಟಿವಿ ಕ್ಯಾಮರಾವನ್ನು ಕಳವುಗೈದಿದ್ದಾರೆ. ಈ ಬಗ್ಗೆ ಪಂಚಾಯತ್ ಕಾರ್ಯದರ್ಶಿ ಎಂ.ಕೆ. ಅಲ್ಫ್ರೆಡ್ ಮೇಲ್ಪರಂಬ ಪೊಲೀಸರಿಗೆ ದೂರು ನೀಡಿದ್ದು, ಅದರಂತೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ. ಕಳವುಗೈದ ಕ್ಯಾಮರಾ  10,000 ರೂ. ಮೌಲ್ಯದ್ದಾಗಿದೆ. ಇಂತಹ ತಲಾ  ಎರಡರಂತೆ  ಕ್ಯಾಮರಾಗಳನ್ನು ಪಂಚಾಯತ್ 10 ಸ್ಥಳಗಳಲ್ಲಿ ಸ್ಥಾಪಿಸಿದೆ.